काठमाडौँ ।
कलाकारिता र पत्रकारिता क्षेत्रबाट उदाएर नेपालको राष्ट्र, राष्ट्रियता, कला, धर्म-संस्कार र संस्कृतिको संरक्षण अभियानमा सक्रिय रहँदै आउनुभएका कालाग्निरुद्रपीठ लड्केश्वर धामका पीठाधीश श्री मुकुन्द शर्मा हुमागाईंले पशुपति क्षेत्र विकास कोषको सदस्य सचिव पदका लागि आफ्नो दरिलो उम्मेदवारी प्रस्तुत गर्नुभएको छ ।

संस्कृति, पर्यटन तथा नागरिक उड्डयन मन्त्रालयले आव्हान गरेको रोष्टरमा उहाँले पशुपति क्षेत्रको आमूल सुधार र रूपान्तरणका लागि स्पष्ट प्रतिबद्धता र कार्ययोजनासहित आवेदन दिनुभएको हो ।
नेपाल सरकारको ढड्डामा उल्लेख भएर पनि ओझेलमा परेको काभ्रेको खोपासीस्थित श्री नरसिंह मठको संरक्षण, सम्बर्धन र प्रवर्धनका लागि आयोजित एक महिने अनुष्ठानमा बोल्दै पीठाधीश हुमागाईंले पशुपतिनाथ क्षेत्रमा ‘लिच्चड’ हरूलाई विकास कोष हाँक्ने जिम्मा नदिन सरकारलाई सुझाव र आग्रह गर्नुभएको छ । उहाँले साधक, शिवतत्व बुझेको र राष्ट्रलाई केही योगदान दिन सक्ने स्वच्छ छविको व्यक्तिलाई मात्र कोषको नेतृत्व सुम्पन आग्रह गर्दै, त्यस्तो व्यक्ति नभेटिए आफ्नो पूर्वकार्य हेरेर अवसर दिन सरकारलाई खुला चुनौती समेत दिनुभएको छ ।

पीठाधीश हुमागाईंले टेलिभिजन कार्यक्रमको माध्यमबाट देशैभरका भक्तजनहरूको सहभागिता जुटाएर विश्वकै अग्लो त्रिशूल निर्माण गरिसक्नुभएको छ भने पूर्वराजा, राष्ट्रपति देखि ७७ वटै जिल्लाका भक्तहरूको उपस्थितिमा भव्य राष्ट्रिय कोटिहोम समेत सम्पन्न गराई आफ्नो कुशल व्यवस्थापकीय क्षमता प्रमाणित गरिसक्नुभएको छ ।

सदस्य सचिव पदमा नियुक्त भएमा आफूले कोषबाट कुनै पनि किसिमको तलब, भत्ता, वा गाडी सुविधा (शिवस्व) नलिने घोषणा गर्दै उहाँले अघि सार्नुभएका मुख्य प्रतिबद्धताहरू यस प्रकार छन् :

१. पशुपतिनाथबाटै सदाचार र भ्रष्टाचारमुक्त अभियान :
विगतमा राजनीतिक तहबाट भएका सुनको जलहरी काण्ड जस्ता विभिन्न आर्थिक अनियमितताका कारण पशुपतिनाथको बद्नाम भएको उल्लेख गर्दै उहाँले कोषमा कडा आर्थिक अनुशासन र पूर्ण पारदर्शिता कायम गर्ने संकल्प गर्नुभएको छ । देशका उच्च पदस्थ व्यक्तित्वहरूलाई पशुपतिनाथमा सामूहिक शपथ ग्रहण गराउने र भेटीघाटीको रकम केवल परोपकार तथा धार्मिक-सामाजिक विकासमा मात्र खर्च गर्ने उहाँको योजना छ ।

२. पूजा व्यवस्थापन र शुद्धता :
पाशुपत क्षेत्रका सम्पूर्ण मन्दिर र पीठहरूमा परम्परागत नित्य तथा पर्व पूजालाई विधिपूर्वक सञ्चालन गरिनेछ । श्री पशुपतिनाथको अभिषेकका लागि वाग्मतीको उद्गमस्थल (वागद्वार/सुन्दरीजल) बाट सिधै पाइपलाइन वा ट्याङ्करमार्फत शुद्ध र पवित्र जल ल्याइनेछ भने पञ्चामृत (दूध, दही, घिउ, मह, सखर) को दैनिक गुणस्तर परीक्षण गरिनेछ । ओमकार परिवारका दर्शनार्थीहरूलाई बिनाकुनै रङ्गभेद पालैपालो दर्शन गर्ने र नित्य दर्शनार्थीहरूका लागि परिचयपत्रको व्यवस्था मिलाइनेछ ।

३. आर्थिक तथा नीतिगत सुधार र आत्मनिर्भरता :
आगामी ३ वर्षभित्र विकास कोषलाई सरकारी बजेटमा निर्भर रहनु नपर्ने गरी विकास बजेटमा पूर्ण रूपमा आत्मनिर्भर बनाइनेछ । कोषका धर्मशाला, पसल र जमिनहरूलाई सार्वजनिक सूचना जारी गरी बढाबढ बोलकबोल (टेण्डर) मार्फत मात्र भाडामा लगाइनेछ । अनधिकृत असुली र भक्तजन ठगिने क्रम पूर्ण रूपमा रोकिनेछ ।

४. भौतिक पुनर्निर्माण र सम्पदा संरक्षण :
भग्नावशेष अवस्थामा रहेका शिवालय र देवालयहरूलाई पुरातत्त्व विभाग र विश्व सम्पदा क्षेत्रको मापदण्ड अनुसार प्राचीन स्वरूपमै पुनर्निर्माण गरिनेछ । वर्षौंदेखि बन्द रहेको वनकाली धर्मशाला र अन्य प्रयोगविहीन सत्तलहरूलाई मर्मत गरी पुनः सञ्चालनमा ल्याइनेछ । विगतमा शक्तिकेन्द्रको बलमा कब्जा गरिएका गुठी जग्गाहरूको खोजी गरी कोष मातहत ल्याइनेछ भने त्रिभुवन अन्तर्राष्ट्रिय विमानस्थलले लिएको गौचरनको जग्गाको क्षतिपूर्तिबारे अध्ययन गरी संवादमार्फत समाधान निकालिनेछ ।

५. व्यवस्थित घाट तथा किरियापुत्री सेवा :
आर्यघाट, भष्मेश्वर र विद्युतीय घाटलाई सेवाग्राहीमैत्री बनाइनेछ । गरिब, असहाय र विपन्नहरूका लागि निःशुल्क शवदाह र काजकिरियाको व्यवस्था मिलाइनेछ । सनातन धर्म परित्याग गरेका (विधर्मी) हरूलाई श्लेष्मान्तक वन क्षेत्रमा भूसमाधि गर्न पूर्ण रोक लगाइनेछ।

६. अन्तर्राष्ट्रिय सम्बन्ध र धार्मिक पर्यटन :
विश्वभरका हिन्दू तथा गैरआवासीय नेपाली (NRN) हरूलाई जीवनमा कम्तीमा एक पटक पशुपतिनाथको दर्शन गर्न प्रेरित गर्ने गरी अन्तर्राष्ट्रिय स्तरमा प्रचारप्रसार गरिनेछ । संसारभर पशुपतिनाथ समन्वय समिति गठन गरी ‘श्री पशुपतिनाथ सेवा सहयोग विश्व कोष’ खडा गरिनेछ । साथै, देश बाहिर रहेका भक्तजनहरूका लागि अनलाइन पूजा, डिजिटल भेटी र कुरियरमार्फत रुद्राक्ष-प्रसाद पठाउने प्रविधिको विकास गरिनेछ ।

७. बृहत् शैक्षिक, सामाजिक तथा जीव कल्याणकारी योजना :
कोषकै व्यवस्थापनमा ‘श्री पशुपति सनातन हिन्दू विश्वविद्यालय’ र गरिब नागरिकको उपचारका लागि ‘श्री पशुपतिनाथ आयुर्वेद चिकित्सालय’ स्थापना गरिनेछ । हाल सञ्चालित वनकाली वेद विद्याश्रमको क्षमता विस्तार गरी १,००० जना बटुकहरूका लागि निःशुल्क आवासीय शिक्षाको व्यवस्था मिलाइनेछ । पाशुपत क्षेत्रका बाँदर, मृग, नन्दी तथा गाईवस्तुको उपचारका लागि पशु चिकित्सकसहितको क्लिनिक र रैथाने गाईहरूको संरक्षणका लागि विशेष गौशाला सञ्चालन गरिनेछ ।

हाम्रो लक्ष्य र नारा :
पीठाधीश हुमागाईंले “भ्रष्टाचारमुक्त, आध्यात्मिक, समृद्ध, व्यवस्थित र विश्व हिन्दू समाजको गौरवपूर्ण केन्द्रका रूपमा श्री पशुपतिनाथ तथा पाशुपत क्षेत्रको विकास” गर्ने मुख्य लक्ष्य राख्नुभएको छ । उहाँले “सदाचार, सेवा र सनातन संस्कृतिको संरक्षण – समृद्ध पशुपति, गौरवशाली नेपाल” भन्ने नाराका साथ पशुपति क्षेत्रको गरिमालाई विश्वस्तरमा पुर्‍याउने दृढता व्यक्त गर्नुभएको छ ।