महोत्तरी, जेष्ठ १ । ज्योति विकास बैंक लिमिटेडले आफ्नो संस्थागत सामाजिक उत्तरदायित्व (CSR) अन्तर्गत जिल्ला ट्राफिक प्रहरी कार्यालय बर्दिबासलाई ट्राफिक व्यवस्थापन तथा सडक सुरक्षामा सहयोग पुर्‍याउने उद्देश्यले ४ थान कन्भेक्स मिरर र ८ थान ट्राफिक कोन हस्तान्तरण गरेको छ ।

जिल्ला ट्राफिक प्रहरी कार्यालय बर्दिबासमा आयोजित कार्यक्रममा बैंकको बर्दिबास शाखाका शाखा प्रबन्धक सुरज देवकोटाले उक्त सामग्री हस्तान्तरण गर्नुभएको हो । कार्यक्रममा मोहन राज गिरी तथा बाबुराम कार्कीको विशेष उपस्थिति रहेको थियो ।
कार्यक्रममा बोल्दै मोहन राज गिरीले बैंकले वित्तीय सेवा मात्र नभई समाजप्रति आफ्नो दायित्वलाई समेत प्राथमिकतामा राख्दै विभिन्न सामाजिक तथा जनहितका कार्यक्रम सञ्चालन गर्दै आएको बताउनुभयो । उहाँले सडक सुरक्षा र ट्राफिक व्यवस्थापनलाई प्रभावकारी बनाउन यस्ता सामग्री उपयोगी हुने विश्वास व्यक्त गर्दै आगामी दिनमा पनि सामाजिक उत्तरदायित्व अन्तर्गत यस्ता सहयोगलाई निरन्तरता दिइने उल्लेख गर्नुभयो ।

त्यसैगरी, शाखा प्रबन्धक सुरज देवकोटाले ट्राफिक व्यवस्थापनलाई थप सहज र सुरक्षित बनाउन कन्भेक्स मिरर तथा ट्राफिक कोनले महत्वपूर्ण भूमिका खेल्ने बताउनुभयो । उहाँले बढ्दो सवारी चापसँगै ट्राफिक सचेतनाको आवश्यकता अझ बढ्दै गएको उल्लेख गर्दै ट्राफिक नियमको पालना र सडक सुरक्षाप्रति सबै नागरिक सचेत हुनुपर्ने धारणा राख्नुभयो ।

जिल्ला ट्राफिक प्रहरी कार्यालय बर्दिबासका इन्चार्ज बाबुराम कार्कीले बैंकले उपलब्ध गराएको सामग्री ट्राफिक व्यवस्थापन तथा दुर्घटना न्यूनीकरणमा उपयोगी हुने विश्वास व्यक्त गर्दै सहयोगका लागि बैंकप्रति धन्यवाद व्यक्त गर्नुभयो ।