सुनिता बराल
महोत्तरीको बर्दिवासमा प्रत्येक वर्ष आयोजना हुँदै आएको सुस्त मोटरसाइकल चलाउने प्रतियोगिता यस वर्ष पनि आयोजना हुने भएको छ । कार्तिक २६ गते आइतबार लक्ष्मी पुजाको दिन बिहान ७ बजेबाट प्रतियोगिता सुरु हुने बर्दिवास युथ क्लबले शुक्रवार पत्रकार सम्मेलन मार्फत जानकारी गराएको छ ।
प्रत्येक वर्ष जस्तै यस वर्ष पनि बर्दिवास युथ क्लबको आयोजनामा सुस्त मोटरसाइकल चलाउने प्रतियोगिता हुन गइरहेको बर्दिवास युथ क्लबका अध्यक्ष सुरज खड्काले जानकारी दिए ।
तिब्र गतिमा मोटरसाइकल चलाउँदा कयौं मानिसको अकालमै ज्यान गइरहेकाले सवारी सुस्त चलाए दुर्घटनाको जोखिम कम हुने सन्देश दिन यस्तो प्रतियोगीता आयोजना गरिएको खड्काले बताए ।
यस वर्ष पनि डेढ सय मानिसले प्रतियोगितामा भाग लिनसक्ने अनुमान क्लबले गरेको छ । प्रत्येक वर्ष निकै उत्साहका साथ प्रतियोगितामा सहभागीले भाग लिदै आएका क्लबले जनाएको छ ।
यसवर्ष सुस्त मोटरसाइकल चलाएर प्रथम हुने ब्यक्तिलाई २२ हजार ५ सय ५०,दोश्रो हुने प्रतियोगिलाई १० हजार ५ सय ५५ र तृतीय हुने प्रतिस्पर्धिलाई ५ हजार ५ सय ५५ पुरस्कारको ब्यबस्था गरिएको क्लबका अध्यक्ष खड्काले बताए ।
क्लबले चाडपर्वको समय बर्दिवासका विभिन्न ठाउँमा पिङ बनाउने, खेलकुदका गतिविधि गर्ने र विभिन्न सामाजिक काममा समेत सहभागीता जनाउँदै आएको छ ।