श्रम संस्कृति पार्टीको निरन्तर विरोधका कारण प्रतिनिधिसभा बैठक स्थगित भएको छ।

बुधबार बसेको प्रतिनिधिसभा बैठकमा विनियोजन विधेयकमाथि विभिन्न मन्त्रालयगत शीर्षकहरूमा छलफल भइरहेको थियो। छलफलका क्रममा सम्बन्धित मन्त्रीहरूले सांसदहरूले उठाएका प्रश्नहरूको जवाफ दिइरहेका थिए।

यसैबीच, श्रम संस्कृति पार्टीका अध्यक्ष तथा सांसद हर्कराज राई साम्पाङले मन्त्रीको जवाफपछि थप स्पष्टीकरण माग गर्ने प्रयास गरेका थिए। तर सभामुख डोलप्रसाद अर्यालले उनलाई नियमअनुसार रोक लगाए।

त्यसपछि श्रम संस्कृति पार्टीका सांसदहरूले बैठक कक्षको वेल घेराउ गर्दै विरोध जनाए। स्थिति नियन्त्रणमा ल्याउन सभामुख अर्यालले सांसदहरूलाई आफ्नो संसदीय कर्तव्य पालना गर्न आग्रह गरे।

‘सभामुखको आदेशको पालना गर्नु सबै माननीय सदस्यहरूको दायित्व हो। श्रम संस्कृति पार्टीका सबै माननीय सदस्यहरूलाई आफ्नो कर्तव्य निर्वाह गर्न सचेत गराउँछु,’ सभामुख अर्यालले भने।

सभामुखले पटकपटक सांसदहरूलाई आ–आफ्नो स्थानमा फर्किन आग्रह गरे पनि विरोध जारी रहेपछि बैठक स्थगित गर्नुपरेको थियो।

सभामुख अर्यालका अनुसार प्रतिनिधिसभा बैठक आजै १५ मिनेटका लागि स्थगित गरिएको हो।