बर्दिवास, साउन २३
सिस्नुपानी नेपाल महोत्तरीको आयोजनामा बर्दिवासमा पहिलोपटक विशेष गाईजात्रा कार्यक्रम “अब हाँस्छ बर्दिवास” हुँदैछ । २०८२ सालको गाईजात्राको अवसर पारेर आयोजना गर्न लागिएको यस कार्यक्रममा विविध हास्यव्यङ्ग्य प्रस्तुति र मनोरञ्जनसहित भव्य कार्यक्रम प्रस्तुत गरिने आयोजक संस्थाले जनाएको छ ।

“अब हाँस्छ बर्दिवास” कार्यक्रम साउन २४ गते (शनिबार) दिउँसो ३:०० बजे बर्दिवासस्थित गौतम होटलमा हुने छ । कार्यक्रममा समाजमा रहेका विकृति, विसङ्गति र सामाजिक यथार्थप्रति व्यङ्ग्यात्मक टिप्पणीसहितका सिर्जनाहरू प्रस्तुत हुनेछन् ।

सिस्नुपानी नेपाल महोत्तरीले यस कार्यक्रममार्फत कला, संस्कृति, हाँस्य र परम्पराको जगेर्ना गर्दै समाजमा सकारात्मक सन्देश प्रवाह गर्ने उद्देश्य लिएको छ । आयोजक संस्थाका अनुसार यो कार्यक्रम बर्दिवासलाई हाँसोले सजाउने अभियानको एक हिस्सा हो ।

कार्यक्रम सफल र स्मरणीय बनाउन सम्पूर्ण नागरिक, कलाकार, पत्रकार, साहित्यकार तथा स्थानीय बासिन्दालाई उपस्थितिका लागि हार्दिक निमन्त्रणा गरिएको छ ।