जीवनराज – बर्दिवास, जेठ १९

विश्व साइकल दिवस २०८२ को अवसर पारेर बर्दिवास साइक्लिङ ग्रुपले विशेष साइक्लिङ कार्यक्रमको आयोजना गर्ने भएको छ । जेठ २० गते विहान ६:०० बजेदेखि सुरु हुने यो कार्यक्रम बर्दिवासस्थित टुटेश्वर मन्दिरको प्राङ्गणबाट आरम्भ गरिनेछ ।

साइक्लिङप्रति रुचि राख्ने उत्साहीहरूमाझ प्रतिस्पर्धात्मक वातावरण सिर्जना गर्ने उद्देश्यले आयोजना गरिने कार्यक्रममा स्लो रेस (२०० मिटर) र स्पिड रेस (१० किलोमिटर) गरी दुई फरक विधामा प्रतिस्पर्धा हुनेछ ।

प्रतियोगितामा सहभागिताका लागि रु. २००० न्यूनतम शुल्क निर्धारण गरिएको छ भने इच्छुकले स्वेच्छाले सोभन्दा बढी सहयोग गर्न सक्नेछन् । विजेता सहभागीहरूलाई प्रथम, द्वितीय र तृतीय स्थानअनुसार आकर्षक पुरस्कार प्रदान गरिनेछ । साथै, सहभागीहरूका लागि विहानको खानाको विशेष व्यवस्था पनि गरिएको आयोजकले जनाएको छ ।

दिगो यातायात, शारीरिक स्वास्थ्य र वातावरणीय सचेतनालाई सघाउँदै स्थानीय स्तरमा जनचेतना फैलाउने उद्देश्यले आयोजना गरिएको कार्यक्रमले बर्दिवास नगरभित्र स्वास्थ्य र हरियालीको सन्देश फैलिने अपेक्षा गरिएको छ ।

कार्यक्रममा सहभागी सबैले हेलमेट र जुत्ता अनिवार्यरूपमा लगाउनुपर्नेछ भने सम्भव भएसम्म सेतो टिसर्टमा सहभागी हुन आयोजकले आग्रह गरेको छ ।

बर्दिवास साइक्लिङ ग्रुपले साइक्लिङप्रेमी सबैलाई समयमै उपस्थित भई कार्यक्रमलाई सफल बनाउन हार्दिक निमन्त्रणा गरेको छ ।