राधाकृष्ण शर्मा
महोत्तरी
नेपाल विद्यार्थि संघ (नेविसंघ)महोत्तरीमा विवाद देखिएको छ । संघका विद्यार्थिहरुसंग छलफलनै नगरि पार्टिका नेताहरुले अध्यक्षमा सुनिल सुमनको नाम केन्द्रमा पठाएको र केन्द्रले सुमनलाई अध्यक्ष तोकिदिएको भन्दै जिल्लामा विवाद सुरु भएको हो ।
केन्द्रबाट अध्यक्षका लागि तीन जनाको नाम पठाउन पत्राचार गरे पनि महोत्तरीबाट सुमनको नाम मात्रै केन्द्रमा सिफारिस भएको थियो । एक विज्ञप्ती सार्वजनिक गर्दै नेविसंघका केन्द्रिय सदस्य विजय रायसहितका विद्यार्थि नेताले जिल्ला र केन्द्रले गरेको निर्णय तत्काल सच्याउन पर्ने माग राखेको छ ।
स्ववियु निर्वाचन नजिकिदै गर्दा नेविसंघको आन्तरिक विवादले जिल्लाका दुई क्याम्पसमा हुने निर्वाचनमा समेत असर पर्ने देखिएको विद्यार्थि नेताहरुले सार्वजनिक गरेको विज्ञप्तीमा उल्लेख छ ।

बुधबार २३ जना विद्यार्थि नेताले सामुहिक रुपमा विज्ञप्तीमा हस्ताक्षर गर्दै जिल्ला र केन्द्रले गरेको निर्णयले नेविसंघको लोकतान्त्रिक इतिहास र गरिमामा चोट पुगेको बताएका छन् । साथै विद्यार्थि नेताहरुले जिल्ला र केन्द्रले आफ्नो निर्णय तत्काल नसच्याए अर्काे नेतृत्व चयन गरेर अघि बढ्न सक्ने चेतावनी समेत दिएका छन् ।
नेपाली कांग्रेसका जिल्ला सभापति नागेन्द्र यादवले भने जिल्लामा छलफल गरेरै सुमनको नाम केन्द्रमा पठाएको दावी गरे । सुमनको नाम विधिवत् रुपमै केन्द्रमा पठाएकाले विद्यार्थिहरुको असन्तुष्टि के विषयमा भन्ने बारे आफुले नबुझेको यादवले बताए ।